पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
..................................
टाॅपिक एक्सपर्ट
एक दार में नईं सोचत के का करने है?
- डॉ (सुश्री) शरद सिंह
अबे लौं अपन ओरें सबईं जने जेई मानत रए के सगरी दुनिया में एक ठंइयां सवाल ऐसो आए जीको सई-सई उत्तर आज लौं कोऊ ने दे सको। कौन सो सवाल? अरे बोई सवाल के पैले मुर्गी भई, के पैले अंडा भओ? मनो अब पतो परो के ईसे बी बड़ो वारो सवाल पाओ जात आए ई दुनिया में। वा बी अपनई सागर शहर में। हो सकत के जे सवाल दूहरे शहरन में थोड़ो-भौत सोई चलत होय, मनो अपने इते तो सबई कऊं ईको डंका बजत आए। चाए कोनऊं रोड पे निकर जाओ, चाए कोनऊं मोहल्ला में घूम आओ, जेई सवाल ठक्काठाई बजत रैत आए। आप ओरें सोच रए हुइयो के ऐसो कोन सो सवाल गए? सो, चलो आपई ओरें बताओ ईको उत्तर के पैले रोड बनी के पैले पाईप डरी?
हमें पतो, के ईको सई-सई उत्तर कोनऊं के पास नईयां। काय से के ने आपने औ ने हमने चार दिनां से ज्यादा कभऊं साबुत मने वन पीस रोड देखी। एक तो रोडन पे गड्ढा-मड्ढा रैतई आएं, ऊपे से रोड कऊं सुधार बी दई तो चिर दिनां में फेर के खोद-खाद के खड़ी कर दई जात आए। एक तो ऊंसई बरसात को मौसम, ऊपे खुदी डरी रोडें। कऊं-कऊं तो ऐसो चिकनो गिलावो रोड पे फैलो रैत आए मनो रोड नोंई घिसलपट्टी होय। हमाए कहे को भरोसो ने होय तो तनक मकरोनिया घूम लेओ। ने तो पीलीकोठी, प्राईवेट बसस्टेंड, ने तो डफरिन वारी रोड तो देखई लेओ। जे रोड बनाबे वारे और पाईप डारबे वारे कभऊं आपस में मिल बैठ के काय नईं तै करत आएं के चलो दोई काम संगे निपटा लए जाएं। ईसें खर्चा बचहे औ परेसानी बचहे। जे ओरें एक दार में नईं सोचत के का करने है? रामधई ! रोडन की जिनगी मिटा डारी आए इन ओरन ने।
-----------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment