पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
..................................
टाॅपिक एक्सपर्ट
तनक सख्ती दिखाओ भैया जू!
- डॉ (सुश्री) शरद सिंह
हरेक मानुस के दो ठईयां कान होत आएं। औ जो कोनऊं खों अपने कान पकरने होंय सो, ऊके लाने ऊपर वारे ने दो ठाईयां हाथ सोई दए आएं। औ दोई कान हाथ की पौंच में रैत आएं। जे नोंई के कान पकरबे के लाने चमीटा चाऊनें परत होय। पर इते तो कछू औरई सीन दिखानों। प्राब्लम इतई की, प्राब्लम वारे इतई के औ प्राब्लम पे नजर राखबे वारे इतई के, फेर बी उने प्रॉब्लम ठीक करबे में देरी काए हो रई? जे पूछबे के लाने उन्हें उते विधानसभा जाने परो। जे बात सोचबे वारी आए।
हऔ हम लाखा बंजारा तला की बात कर रए।कौनऊं की आंखन में फूला नोंई परो, के दिखाए नोंई। जे सबई देख रए के तला को उद्धार को काम मुतकी सालों से घिसट रओ। अब लग रओ हतो के ई दफा बरसात के पैले-पैले तला संवर जैहे, सो ने संवरो। काय नईं संवरों? संवरबे में देरी काय हो रई? जे पूछबे के लाने अपने नगर विधायक भैया जू खों विधानसभा में पौंच के प्रश्न पूछने परो। सरकार अपनी, प्रशासन अपनो, अधिकारी अपने औ पूछबे उते जाने परो। ऐसो काय? जे तो बई भओ के अपनों कान पकरबे के लाने चमीटा काम में लाने परो होय। भओ जे चाइए के प्राब्लम ने सुधार पाने वारों की पैलई खिंचाई करी जाए, जोन से जे नौबत ने आए। काय से के ईसे पब्लिक में अच्छो मैसेज नईं जात। पब्लिक सोचत आय के जो उने उते जा के पूछने पर रओ सो इते हमाई को सुनहे? सो, तनक इतई सोई सख्ती दिखाओ भैया जू!
-----------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment