टॉपिक एक्सपर्ट | पत्रिका | सबई खों पालन करो चाइए दसलक्षण | डॉ (सुश्री) शरद सिंह

पत्रिका | टॉपिक एक्सपर्ट | डॉ (सुश्री) शरद सिंह | बुंदेली में

..................................

टाॅपिक एक्सपर्ट

सबई खों पालन करो चाइए दसलक्षण

- डॉ (सुश्री) शरद सिंह

     गणपति बप्पा बिराजे हैं औ संगे जैन समाज को दसलक्षण परब सोई चल रओ । बप्पा सो भलो करहेईं, मनो अपन ओरन खों बी कछु अच्छे काम करो चाइए जीसे जिनगी सुदर जाए। अच्छी बातें सबई धरम में होत आएं। सो, अच्छी बातें चाए जोन धरम की होंए बे सबई मानुस को पालन करो चाइए। जो ने पतो होय सो खुदई देख लेओ। पैलो लक्षण आए क्षमा। दूसरो आए मार्दव। ने लड़ो औ ने झूठो गरब न करो। तीसरो आए आर्जव। मने दूसरों से जलापिट्टी ने करो। चौथो आए सत्य। अब ई बारे में आप सब खुदई जानत हो। पांचवो आए शौच। मने बुरई आदतन औ लालच खों छोर देओ। छठो आए संयम। सो, सहूरी धरे में भलाई ठैरी। सातमों तप औ आठमों आए त्याग। ईको मतलब जे के नोने काम करो औ सबरी बुराई खों छोर देओ, सो गिरहस्थी बी नोनी चलहे। नौमों अंकिचन औ दसमों आए  ब्रह्मचर्य। अंकिचन मने नियम खों पालो औ ब्रह्मचर्य मने बुरई आदत़ें छोर के भले मानुस बनो। सो जे सबरे लक्षण सबई के पालन जोग आएं। सांची कई के नईं?

    जो पइसा की जोड़ा-जोड़ी में ने परो जाए, सो जिनगी आसान हो जाए। फेर  रिशवतखोरी, कामचोरी, मिलावटखोरी ने हुइए। दूसरन की मदद करो। औ संगे, सांची बोलो औ कोनऊं सल्ल ने पालो। गणपति बप्पा बी जेई कैत आएं औ महवीर जू जेई कैत आएं। जो अपन ओरें अच्छे से रैहें, तो अपनो घर-परिवार अच्छो रैहे। जो घर-परिवार अच्छो रैहे, सो अपने गांव-शहर अच्छे रैहें। अच्छे गांव-शहरन सेई तो अपनो देस अच्छो रैहे। सो गणपति बप्पा खों पूजो औ दसलक्षणन खों मानों। फेर सब अच्छो-अच्छो हुइए।

-----------------------------

Thank you Patrika 🙏

Thank you Dear Reshu Jain 🙏

#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका  #patrika #rajsthanpatrika #सागर  #topicexpert #बुंदेली #बुंदेलीकॉलम