टॉपिक एक्सपर्ट | पत्रिका | ऐसई किरपा बनाए राखियो, मालिक | डॉ (सुश्री) शरद सिंह

 

पत्रिका | टॉपिक एक्सपर्ट | डॉ (सुश्री) शरद सिंह | बुंदेली में

..................................

टाॅपिक एक्सपर्ट

ऐसई किरपा बनाए राखियो, मालिक !

- डॉ (सुश्री) शरद सिंह

   सांची! आज तनक जी जुड़ा गओ। अच्छो-अच्छो सो लग रओ। आज लग रओ के अपन ओरें बी कछू आएं। काए से के अपन तो जनम-जनम के मंगता घांई रये, मनो पैली बेर देबे वारे चल के अपने दोरे आए। काम-धंदों के लाने इते तो कैत-कैत गरो बैठ गओ, लिखत-लिखत सियाही बढ़ा गई मनो रओ बोई निल बटो सन्नाटों। ऊपे पैले पढ़त रैत्ते, सुनत रैत्ते के इन्दौर में कॉन्क्लेव भओ, भोपाल में भओ, यां लो खजुराहो तक में भओ मनो अपने सागर में ऐसो कछू कभऊं ने भओ। जे पैली दार आज के इत्तो बड़ो वारो कॉन्क्लेव इते भओ। अपनो मूंड़ सोई ऊंचो हो गओ। अब निवेशक हरें इते पइसा लगाहें, सो इते कछू काम निकरहे। जो काम निकरहे, सो इतई रुजगार मिलहे। बा चीलगाड़ी मने हवाई जहाज की बात सोई चल रई। इते हवाई अड्डो बन जैहे सो औ उद्योग-धंदे वारे इते आहें। जे शेखचिल्ली की किसां नोईं। अब लगन लगो के अपने सागर के भाग खुल जैहें। सो, मोहन भैया औ अपने इते के नेता हरों को धन्यवाद देबो सो बनत आए।

      देखो जाए सो अब आओ असली वारो परीच्छा को टेम के अपने इते के प्रशासन वारे निवेशकन से सागर खों  कित्तो फायदो दिला पाउत आएं। बे ठैरे निजी वारे। जो उने अपने हिसाब से सुविदा ने मिलहे सो बे अपनो बोरिया-बिस्तरा बांध लैंहे। औ संगे दूसरे जने बी ने आहें। निवेशकों के संगे मिल के चलियो औ काम बनाइयो, भैया हरों! सो, जे सुनैरो मौका आए सागर को भाग बदलबे को। औ जोन जे मौको इते लाएं, उन सबई से जा बिनती आए के ऐसई किरपा बनाए राखियो, मालिक !

-------------------------

Thank you Patrika 🙏

Thank you Dear Reshu Jain 🙏

#टॉपिकएक्सपर्ट #डॉसुश्रीशरदसिंह  #DrMissSharadSingh #पत्रिका  #patrika #rajsthanpatrika #सागर  #topicexpert  #बुंदेली  #बुंदेलीकॉलम