आज पत्रिका में "टॉपिक एक्सपर्ट" में बुंदेली में मेरे विचार ...Thank you #Patrika🙏
Thank you Dear Reshu Jain 🙏
..................................
टाॅपिक एक्सपर्ट
ने इने फिकर ने उने फिकर
- डॉ (सुश्री) शरद सिंह
कछू ज्यादा दिनां पैले की नईं, अबई काल संझा की बात आए। हम ओरें तीन-चार जनी कछू खरीदबे के लाने पैदल तिगड्डा लौं जा रईं हतीं के फर्राटा भरत भई बाजू से एक फटफटिया गुजर गई। जोन भौजी ओ साईड में हतीं, बे सकपका के रैं गईं। बे अबे सम्हर नें पाईं हतीं के एक औ फटफटिया ऊंसईं फर्राटा भरत भई उनकी बाजू से कढ़ गई। ऐंसे बे भौजी सलीके वारी आएं, मनो फटफटिया के टेरर ने उने डरा दओ, सो गरियान लगीं। उन्ने बे फटफटिया वारन की दारी-मतारी एक कर दई। हम ओरन ने भौजी खों सम्हारो। बाकी हम ओरन को ध्यान ई बात पे गओ के उन दोई फटफटिया पे मने बाईक पे तीन-तीन मोड़ा लदे हते। छैऊ के छैऊ बिना हैलमेट के। औ स्पीड की तो पूछियोई मत। ऐसो फर्राटा मार के निकरे मनो दोई बाईक वारे रेस कर रए होंए। जबके बा कोनऊं रेसकोर्स ने हतो, सिविल लाईन से मकरोनिया वारी रोड हती रोड।
नियम तो जेई आए के एक बाईक पे दो से ज्यादा ने बैंठें, औ बाईक पे बैठबे वारे दोई जने हैलमेट पैनें, चाए लुगवा होय चाए लुगाई। अरे मूंड़ तो दोई के एक से होत आएं। कछू आड़ो-तिरछो हो जाए तो मूंड़ई में पैलऊं घलत आए। औ स्पीड के लाने कओ जात आए के शहर के भीतरे 20-30 से ज्यादा की स्पीड नईं राखो चाइए। मनो अपने इते जे खाली यातायात सप्ताह पे याद करओ जात आए, बाकी टेम पे ने इने फिकर, ने उने फिकर। ने बाईक वारे अपने मूंड़ की सोचत आएं औ ने ट्रेफिक वारे उनें कसत आएं। जे कोन टाईप की स्मार्टनेस आए?
-------------------------
#डॉसुश्रीशरदसिंह #बुंदेलीलेख #DrMissSharadSingh #पत्रिका #patrika #rajsthanpatrika #topicexpert #टॉपिकएक्सपर्ट
#बुंदेली #सागर #बुंदेलीकॉलम
No comments:
Post a Comment