आज पत्रिका में "टॉपिक एक्सपर्ट" में बुंदेली में मेरे विचार क्षेत्र की एक समस्या पर....
Thank you #patrika 🙏
Thank you Dear Reshu Jain 🙏
..................................
टॉपिक एक्सपर्ट
जे कोन टाईप की अस्पतालें आएं?
- डॉ (सुश्री) शरद सिंह
जबे देखो, कछू ने कछू सल्ल बिधीं रैत आए। कभऊं सुनबे में आऊत के बीएमसी मने बुंदेलखंड मेडिकल कालेज में ड्यूटी डॉक्टर अपनी ड्यूटी पे नईं मिलो, जो मिलो तो ऊने मरीज खों ठीक से नई देखो, तो कभऊं पतो परत आए के जिला अस्पताल में गंदगी मची रैत आए, सो कऊं छत चुअत रैत आए। रामधई, आए दिन जेई सब सुनबे, पढ़बे में आत रैत आए। सो, सोचबे की बात जे, के जे अस्पतालें बीमारन के ईलाज के लाने आएं के लोगन खों बीमार करबे के लाने?
जो जे अखबार वालें भैया, बैना हरें जब लोगन से पूछत आएं, सो एकई जवाब मिलत आए के उते की व्यवस्था सुधरो चाइए। मने व्यवस्था में गड़बड़ी तो कहानी। जेई से सब सुधार की मांग करत रैत आएं। औ मजे की बात जे के जोन दिनां अपने विधायक भैया हरें दौरां करत आएं, ऊ दिनां दोई अस्पतालें झाड़-बुहार के चकाचक कर दई जात आएं औ जो उन्ने पीठ करी, सो बेई बिलौटा, बेई चोखरवां।
ऊंसई सोचबे वाली बात आए के जो इते की जे सरकारी अस्पतालें सईं होतीं तो मरीज के घर वाले सैंकड़ों रुपैया फूंक के अपने मरीज खों ले के नागपुर, भोपाल या कऊं औ बाहरे की अस्पतालें काय भगत फिरते? ऐसो नइयां के अपने इते अच्छे डॉक्टर नईयां। अपने इते सोई अच्छे-अच्छे डॉक्टर आएं। पर बाकी दसा सो गड़बड़ आए। अब का कोन-कोन सी गड़बड़ी आए, जे तो जांच करवाबे मेंई पता परहे। पब्लिक तो अपनोंईं दुख तकलीफें बता सकत आए, बाकी तो प्रशासनई कछु कर सकत आए, औ नेता हरें चाएं सो बे सोई सब कछू ठीक कर सकत आएं।
-----------------
#डॉसुश्रीशरदसिंह #बुंदेलीलेख #DrMissSharadSingh #पत्रिका #patrika #rajsthanpatrika #topicexpert #टॉपिकएक्सपर्ट
No comments:
Post a Comment