आज "पत्रिका" में "टॉपिक एक्सपर्ट" में...
Thank you #patrika 🙏
Thank you Dear Reshu Jain 🙏
..................................
टाॅपिक एक्सपर्ट
जे घचापेल कबै मिटहे?
- डॉ (सुश्री) शरद सिंह
अपने इते का आए के जित्तो कओ जात है, उत्तो करो नईं जात। अब आप ओरें कैहो के अब सो आचार संहिता लग गई, सो अबे कछू नईं हो सकत। चुनाव पूरो होने लों गम्म खाओ। आपको कैबो अपनी जांगा ठीक आए, मनो इते तो गम्म खात-खात गमगीन भए जा रए। बात मूंड़ पे हाथ दे के सोचबे की आए। का होत है के, जो कोनऊं त्योहार आऊत आए सो बाजार जाबे के नांव पे फुरूरी-सी होन लगत आए। अब जे ना सोचो के नओ का भओ? जोन जो हम कै रए जो नओ नोईं। मुतकी सालें हो गईं, जे झेलत-झेलत, पर जे समस्या आज लों ऊंसई की ऊंसई ठाड़ी।
जे अपने इते को ट्रेफिक मट्ठर समस्या आए। अब तो जे दसा हो आई है के ईपे कछू कैबे, लिखबे में शरम सी आऊत आए। एक तो ऊंसई रोडन-सी रोड नईं दिखात। चाए कटरा देख लेओ, चाए नमकमंडी, चाए गुजराती बाजार वारी रोड औ चाए विजय टॉकीज वारी रोड। औ बड़ा बाजार वारी रोड की सो कछू ने पूछो। भारी घचापेल मची रैत आए। आधी रोडों पे सो गाड़ियां ठाड़ी रैती आएं, बची आधी, सो ऊपे बा बैलवां औ सांड़ हरें टहलत रैत आएं। मनो मजे की बात तो जे कहानी के कटरा वारी रोड के तीनबत्ती वारे छोर पे तीन-चार ट्रेफिक वारे ड्यूटी देत रैत आएं औ रोड के दूसरी छोर पे ट्रेफिक वारन की चौकी ठाड़ी। औ बीच में ट्रेफिक इत्तो के मनो कुंभ के मेला में घूम रए होंए। रोडें चौड़ी ठैरीं, मनो लगत हैं कुलिया-सीं। अबे पार्किंगलाट बनबे में कुल्ल टेम लगहे, का जबलों ऐसई घचापेल मची रैहे? जे कैसी स्मार्टनेस आए ?
-------------------------
#डॉसुश्रीशरदसिंह #बुंदेलीलेख #DrMissSharadSingh #पत्रिका #patrika #rajsthanpatrika #topicexpert #टॉपिकएक्सपर्ट
#बुंदेली #सागर #बुंदेलीकॉलम
No comments:
Post a Comment