पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
..................................
टाॅपिक एक्सपर्ट
जां पुलिस वारे कुट रए उते बाकी को का हुइए
- डॉ (सुश्री) शरद सिंह
रामधई! काल हमाई बड़ी किरकिरी भई। का भऔ के हमाई एक सहेली दिल्ली में रैत। काल जबे हम दोई फोन पे बतकाव कर रए हते तो बा बोली की आओ तनक दो-चार दीनां के लाने दिल्ली घूम जाओ। इते बुक फेयर चल रओ सो संगे बा सोई घूम लइयो। हमने ऊसे कई के अबे तो ने आ पाहें, बाकी तुमाई दिल्ली हमें नईं पुसात। सो ऊने पूछी काय? हमने कई के एक तो उते भारी प्रदूषण रैत आए औ दूसरों रीजन जे के हमें उते सेफ फील नई होत। तुमाई दिल्ली में कछू ने कछू बड़ो अपराध होत रैत आए। सो, हमें उते ने बुलाओ। ईसे तो अच्छो के तुमई सागरे घूम जाओ।
हमाओ बुलौवा सुन के बा बोली के ज्यादा ने इतराओ तुमाए इते कोन सी अच्छी दसा आए। हमने कई के जो का कै रईं इते सागर में डराबे वारी कोनऊं बात नइयां। बा कैन लगी के काय, सागर का एमपी से बाहरे आए? तुमाए एमपी में पुलिस वारे कुट रए औ तुम कै रईं के सब ठीक आए। ऊने मजाक उड़ाई। मोसे कछू बोलत ने बनो। काय से के इंदौर में एक एसआई खों चलत कार में तीन गुंडा आधे घंटा लौं कूटत रए। ओई पे हमाई सहेली ने हमें टॉन्ट मारी। हमें बड़ी किरकिरी लगी बाकी ऊकी बात सई हती के जां पुलिस वारे कुट रए उते बाकी को का हुइए? सो बा सहेली ने इते सुरक्षा व्ववस्था को खीबईं मजाक उड़ाओ औ मोसे मों बोलत ने बनो। काय से के उते रीवा में तो पुलिस वारे जान बचाबे की गुहार पैलई लगा चुके। फेर खयाल आओ के पैले अपने सागर के गली-मोहल्ला में पुलिस की गश्त होत्ती, अब बा नईं होत। अब सबरे सीसीटीवी तो लगवा नईं सकत। औ सीसीटीवी से को डरा रओ? जां पुलिस खुदई कुट रई।
-------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment