टॉपिक एक्सपर्ट | इते तो खाली बम्प दिखात आएं सूचना नोंई | डॉ (सुश्री) शरद सिंह | पत्रिका | बुंदेली कॉलम

टॉपिक एक्सपर्ट | इते तो खाली बम्प दिखात आएं सूचना नोंई | डॉ (सुश्री) शरद सिंह | पत्रिका | बुंदेली कॉलम

टाॅपिक एक्सपर्ट  

इते तो खाली बम्प दिखात आएं सूचना नोंई

- डॉ (सुश्री) शरद सिंह

        का भऔ के कल्ल हमाए एक चिन्हारी वारे ने सोसल मिडिया पे अपनी फोटूएं चिपकाईं। बे आजकाल अपने मोड़ा के लिंगे अमरीका गए हैं। सो,  उन्ने उते अपने घूमत टेम की चार-छै ठाइयां फोटू चपका दईं। हमने देखी तो हम देखतई रै गए। उने नोंई। औ ने उते के खबसूरत सीन देख के। हम तो जा देख के देखत रै गए के उनके पांछू लगे खम्बा पे एक ठो सूचना लिखी रई, जीमें लिखो रओ के ‘स्पीड बम्प 12 किमी’। बा सू्चना पढ़ के हमाई आंखें खुली के खुली रै गईं। काए से के अपने इते तो रोड पे मुतके बम्प तो बना दए जात आएं पर उते एक ठइयां सूचना लिखबे की याद कोनऊं को नईं रैत। ने तो कछू लिख के बताओ जात आए औ ने तो डिजाइन सी बना के। सो, होत का आए के चलत-चलत एकदम से बम्पर आंगू आ जात आएं, जीमें उचके बिगर बच नईं सकत। औ कऊं-कऊं तो चार-चार ठइयां  बम्प ठाड़े कर दए गए आएं। ने मानों तो तनक सिविल लाइन से मकरोनिया जा के देख लेओ। औ ऊ पे बी जी ने भरे तो मकरोनिया से बहेरिया तिगड्डा निकर जइयो। एक बम्प पे तो मनो गाड़ी एक दार उचकत भर आए, औ जो चार-चार बम्प होंए तो ऐसो लगत आए के कोनऊं ने सूपा पे फटक दओ होए। स्कूटी, मोटर सायकिलें सो ऐसी उचकत आएं मनो तनक ने सम्हार पाओ तो मों के बल गिरबो तै समझियो। 

     मनो एक तरफी तो अपन ओरें अमेरिका वारन की बराबरी करबो चात आएं औ दूसरी तरफी अपने इते बिगर सूचना के बम्प बना के अपनेई लोगन के हात-गोड़े तोड़बे चात आएं। का लंगड़ा-लूला हो के अमेरिका की बराबरी करबी? तनक सोचियो!

------------------------------

Thank you Patrika 🙏

Thank you Dear Reshu Jain 🙏

#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका  #patrika #rajsthanpatrika #सागर  #topicexpert #बुंदेली #बुंदेलीकॉलम