टॉपिक एक्सपर्ट | चलो, आवारा पशुअन खों सोई मताई-बाप मिल जैहैं | डॉ (सुश्री) शरद सिंह | पत्रिका | बुंदेली कॉलम
टाॅपिक एक्सपर्ट
चलो, आवारा पशुअन खों सोई मताई-बाप मिल जैहैं
- डॉ (सुश्री) शरद सिंह
जे अपने ई सहर में रोडन की तीन पिराबलम बरहमेस बनी रैत हैं- एक तो जे बनत हैं फेर खुदत हैं, बनत हैं खुदत हैं, बनत हैं खुदत हैं। दूसरी पिराबलम जे के इनपे टिरेफिक की अत्ते मची रैत हैं। को कब कां से निकर आए ईको कोनऊं ठिकानों नईं। कब कोऊं फर्राटा भरत भओ बाजू से कढ़ जाए, कछू कओ नईं जा सकत। गलियन-कुलियन में कछू रोडें सो बच्चा हरों के खेलबे को मैदान बनी रैत आएं तो कछू स्पीड ब्रेकरन से पटी रैत आएं। जेई से तो जे चुटकुला चलत आए के जोन ने सागर की रोडन पे गाड़ी चला लई बा देस के कोनऊं बी सहर में गाड़ी चला सकत है। खैर, तीसरी सबसे बड़ी पिराबलम आए आवारा पशुअन की। बे छुट्टा-छोर घूमत रैत आएं। कऊं बी पसर गए, कऊं बी ठाड़़े हो गए। औ कभऊं बी आपस में लड़ परत आएं। जबें भरी रोड पे दो सांड लड़ परें, सो आपई सोंस लेओ के का होत हुइए। दो-चार जने के हात-गोंड़ तो टूटतई आएं।
अब जे अच्छो होबे जा रओ के आवारा पशुअन खों गोद ले लौ जैहे। रामधई, कित्तो नोनों आइडिया आए जे। उन पशुअन खों ठिकानों मिल जाहे औ रोडन खों उनसे छुटकारो। मनो जे तो प्लान बनाओ गओ आए आवारा गइया, बैलवा के लाने, बाकी कुत्तन खों को गोद ले रओ? काए से के शहर में कुत्ता सोई मुतके आएं जो ईको, ऊको काटत फिरत हैं। बाकी जित्ते आवारा पशुअन खों गोद लओ जा रओ उनखों औ उनको गोद लेबे वारों खों बधाई! उमींद आए के ईको रिजल्ट अच्छो रैहे।
—--------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment