टॉपिक एक्सपर्ट | पत्रिका | कछू करियो, ने करियो, मतदान जरूर करियो | डॉ (सुश्री) शरद सिंह

पत्रिका | टॉपिक एक्सपर्ट | डॉ (सुश्री) शरद सिंह | बुंदेली में

..................................

टाॅपिक एक्सपर्ट

कछू करियो, ने करियो, मतदान जरूर करियो

    - डॉ (सुश्री) शरद सिंह

      जे सई के अपने इते भौत कमी आए। मुतके काम ऐसे डरे के कभऊं-कभऊं लगत आएं के जे अपन की जिनगी में तो कभऊं पूरे ने हुइयें। कछू काम चल रए, सो उनकी स्पीड देख के चिटियां सोई शरमां जाएं। उत्तई नईं, गजब की बात तो जे आए के बनी-बनाई सड़क खोदबे को काम में कोनऊं अलाली नईयां। अभईं रजाखेड़ी रोड पे गई रई, सो देखी के रोड खुदी डरी। पूछबे पे पतो परो के उते पाईप लाईन डरने। सो, का प्लानिंग वारे भैया हरें साजी रोड बनबे खों तके बैठे हते, जो पैले पाईप लाईन ने डार पाए। जे सोई सांची आए के अपने इते अच्छे औ सस्ते इलाज के लाने बाहरे भगने परत आए। जे सोई सई आए के अपने इते रेलगाड़ियां कम आएं। चीलगाड़ी मने हवाई जहाज की तो बातई छोड़ो। अपने इते के तला की का कएं, ऊपे बनो कारीडोर फटो जा रओ। ऊपे दरारें दिखन लगीं। सो, इते समस्याएं तो मनो कुल्ल आएं, इत्ती के गिनाबे बैठो सो उंगरियां दुखन लगें।

     मनो, ईको मतलब जे नोईं के अपन मतदान करबे खों ने जाएं। एक भैया मिले सो कैन लगें के कोनऊं कछू नईं करत, हम काए जाएं मतदान करबे? अब जे का बात भई? अरे, अपन ओरन खों गुस्सा है अधिकारियन पे, अपने नेता हरों पे सो तब तो मतदान करबे और पौंचो चाइए। अपनों मतदान को पावर दिखा दओ चाइए। जोन उम्मीदवार ठीक लगे, उनको जिताओ औ अपनों पावर दिखाओ। घरे बैठ के गरियाबे से कछू ने हुइए। जेई तो टेम आए बताबे को के आप का चात हो? सो, हमाई मानो तो कछू करियो, चाए ने करियो, मनो मतदान जरूर करियो। ईसे सबको भलो हुइए।

-----------------------------

Thank you Patrika 🙏

Thank you Dear Reshu Jain 🙏

#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका  #patrika #rajsthanpatrika #सागर  #topicexpert #बुंदेली #बुंदेलीकॉलम 

#मतदानदिवस  #मतदान2024  #मतदानमहादान #मताधिकार #votingday #votingpower  #voting  #voting2024  #मतदानजागरूकता #voters  #VotingAwareness  #letsdoit