पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
Thank you #patrika 🙏
Thank you Dear Reshu Jain 🙏
..................................
टाॅपिक एक्सपर्ट
जे कोन टाईप के शिक्षा केंद्र आएं?
- डॉ (सुश्री) शरद सिंह
रामधई, तरे-ऊपरे एक-सी किसां चल रई। ऊपरे मुन्नाभाई हरें पकरे जा रये औ नैंचे घुन्नाभाई हरें योजनाओं खों लूघरा छुबा रये। अपने इते की इत्ती नोनी यूनिवर्सिटी में को जाने कां से गजभिए नांव के एक कुलपति आए रये के उनकी लगाई कारिख से अबे लौं करिया करम वारे निकरत जा रये। सबई सोच रये हते के बा कुलपति जू अपने घोटालन के लाने जेल की सैर कर आए, सो लगो के अब सब ठीक हो गओ। मनो इते तो लड़ुअन के ढेर में चोखरवा पिड़े कहाए। एकाद-एकाद ठइयां मुन्नाभाई निकरतई जा रये। ने मानो सो देख लेओ, उपकुलसचिव के लाने करी गई नियुक्ति में झोलई-झोल दिखा रये। उनको जबे प्रभारी कुलसचिव बनाओ गओ, सो कछू हरों ने बाल की खाल निकार दई, ने तो ऊंसई-ऊंसई को जाने कब लौं चलत रैत।
जेई कछू दसा तरे वारन की आए। मनो इते भर्ती घोटाला नोंई, पर टेबलेट घोटाला आए। खात के टेबलेट नोंई, कम्प्यूटर वारे। सरकार ने स्कूलन के लाने टेबलेट खरिदवाए के मोड़ा-मोड़ियन को भलो हुईए। ने तो सरकारी स्कूलन के पढ़नवारे प्राईवेट स्कूल वारन से पांछूं रै जात आएं। टेबलेट की खरीदी भई, स्कूल में बे भिजवाए सोई गए, मनो बे कोनऊं काम नई आ रये। काय से कऊं कछू खों चलाबो नईं आत, तो कछू खों ऊमें रुचि नईयां। पांच करोड़ के टेबलेट छूंछे धरे। सरकार पढ़बे वालन को भलो करो चात आए, जागरूक नागरिक औ पत्रकार हरें घोटालन पे सर्च लाईट चमकाऊत रैत आएं। बाकी अब ई टाईप के मामलन के लाने ऊपर वारे जिम्मेदार अधिकारी हरें कछू अपने संज्ञान में लैवें तो बात बनहे। ने तो पढ़बे वारन को भविष्य अंधियारो कहानो।
-------------------------
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment