पत्रिका | टॉपिक एक्सपर्ट | डॉ (सुश्री) शरद सिंह | बुंदेली में ...Thank you #patrika 🙏
Thank you Dear Reshu Jain 🙏
..................................
टाॅपिक एक्सपर्ट
ईको कोनऊं हल आए के नईं ?
- डॉ (सुश्री) शरद सिंह
अभईं हफ्ता भर पैले की बात आए के रात को नौ बजे कछू हल्ला-गुल्ला सुनाई परी। पैले तो हमें लगो के कोनऊं के इते कोऊ मिलबे वारे आएं हुइए, सो हमने ध्यान नई दओ। ऊंसई ऊ टेम पे टीवी चल रई हती सो ऊकी आवाजें सोई हतीं। मनो जैसई विज्ञापन आन लगे सो हमने टीवी म्यूट कर दई। सो, बाहरे की आवाजें कछू साफ सुनाई परीं। कोऊ जोर-जोर से कै रओ हतो के "सबरे भीतरे रओ! बाहरे ने निकरियो!"
जा सुनके हम चौंके। हमें लगो के को जाने का हो गओ? फेर आवाज सुनाई परी के "उते गओ, उते गओ!" जा सुनके हमें चिंता सी भई। खिड़की से झांक के देखी, सो चार-पांच जने दिखाने। कछू समझ ने आई तो कालोनी में एक के इते फोन लगाओ। फोन पे जो सुनो ऊसे फुरूरी-सी दौड़ गई। उन्ने बताओ के एक सांड़ पगला गओ आए। ऊको पकरबे के लाने मुतके लोग निकरे हैं। आवारा ढोरन से ऊंसई डर लगत आए, फेर पगलौंटा सांड़ की सुन के तो होसई उड़ गए। मनो, सुभै लौं ऊको पकर लओ गाओ। ऊने कछू जने खों पटखनी दई रई, बाकी कोनऊं अनहोनी ने भई।
ई घटना के बाद बी कालोनी में छु्ट्टा गाय-गरुआ कम ने भए। कालोनी भर में का? चाए मकरोनिया पे देख लेओ, चाए कटरा बाजार में देख लेओ। सिविल लाईन होय चाए फोरलेन, छु्ट्टा गाय, बैल, सांड़ सबई फिरत दिखात। कऊं-कऊं तो झुंड बनाए सड़क पे बैठे रैत आएं। ऐसो लगत है के ई समस्या को कोनऊं हल नोंईं। काय, कभऊं जे समस्या हल हुईए की नईं? के कोनऊं कदम उठाबे के पैलऊं कोऊ बड़े हादसे को इंतेजार आए?
-------------------------
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment