पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
Thank you #patrika 🙏
Thank you Dear Reshu Jain 🙏
..................................
टाॅपिक एक्सपर्ट
लगन लगे बिजली के स्मार्ट झटका
- डॉ (सुश्री) शरद सिंह
बिजली खों छूबोई गलत आए। जो बिजली खों छूहो सो झटका लगहेई। मनो जो बिजली खों छिए बिगैर झटका लगन लगे, सो का करो जाए? अब आप सोच रए हुइयो के जे कां की फकाईं दे रईं, जो ऐसो कऊं हो सकत के बिजली खों बिगैर छुए झटका लग जाए? पर ऐसोई हो रओ अपनी स्मार्ट सिटी में। जोन खों ने मानने, सो ने माने, मानो हमने तो अपने जेई दोई सगे कानों से सुनी आए औ दोई सगी आंखन से पढ़ी आए।
होत का आए के अपने इते धरारपटी में योजनाएं लागू कर दईं जात आएं। ने कोनऊं होमवर्क औ ने कोनऊं बाद की फिकर। औ उने काए फिकर हुइए? जोन को मुस्किल आहे, बा खुदई भगत फिरहे। जेई सो हो रओ। का आए के अपनी मोंबोली स्मार्ट सिटी के मुतके घरों में लगा दए गए स्मार्ट मीटर। जे मीटर खपत की रीडिंग खुदई बिल के लाने भेज देत आएं। रीडिंग वारे को काम खतम। मनो उनके लाने भौतई अच्छो आए जोन के घरे मीटर अहाता में लगे औ बे दुफैरी में घरे नई रहत। मनो सल्ल जे आए के मीटर बदलत समै जोन रीडिंग बताई गई हती बिल पौंच रए ऊसे ज्यादा। अब स्मार्ट मीटर के स्मार्ट बिल को झटका खाबे वारे इते-उते भगत फिर रए। बाकी बिजली वारे कए रए के जोन शिकायत लेके हमाए इते आहे, सो हम शिकायत दूर कर देबी। जै हो! बिचारो उपभोक्ता अपनों सबरो काम-धंधा छोड़ के बिल सुधराबे फिरत रए। कायदे से तो स्मार्ट मीटर वारे मोहल्लों में शिविर लगाओ चाइए। कछू तो स्मार्टली सोचो चाइए उपभोक्ता की सुबिधा के लाने।
-------------------------
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment