टॉपिक एक्सपर्ट | पत्रिका | हैप्पी दिवारी मने बिगैर प्रदूषण दिवारी | डॉ (सुश्री) शरद सिंह

आज पत्रिका में बुंदेली "टॉपिक एक्सपर्ट"...

Thank you #patrika 🙏

Thank you Dear Reshu Jain 🙏

..................................

टाॅपिक एक्सपर्ट

हैप्पी दिवारी मने बिगैर प्रदूषण दिवारी

- डॉ (सुश्री) शरद सिंह

          दिवारी को टेम आए। पाटाखें बी घलहें और फुलझड़ियां बी चलहें। मनो जे बात ध्यान में रखबे जोग आए के जे सबरी चीजें हर तरह को प्रदूषण पैदा करत आएं। पटाखों और बारुदवारी सबरी चीजों से खूबई वायु प्रदूषण होत आए। जबके अपनो शहर, अपनो जिला, अपनो संभाग सबई में प्रदूषण कम से कम रैत आए। तनक दिल्ली के प्रदूषण की दसा से पे नजर डारो, सो अपने इते की हवा शुद्ध ठैरती आए। सो, ई दफा जे शुद्ध हवा में बारूद की गंध ने घोलियो। अभई अपने इते एक जैन मुनिश्री जी ने सोई कई के ई दिवारी को पटाखा मुक्त राखियो। काए से के पटाखा की तेज आवाज से पशु-पक्षी हरें डरा जात आएं। बारूद की गंध से उनको सोई दम घुटत आए। सो पटाखा चलाबे में पशुअन खों कष्ट होत आए। जेई टाईप से जित्ते बी बारूद वारे आईटम रैत आएं उनसे चाए मानुष होंय, चाए पशु होंय, चाय पक्षी होंए, सबई खों तकलीफें होत आए। सो, जोन काम से दूसरन तकलीफें पौंचे, बा काम करोई काय को? 

   मनो आप ओरें सोचत हुइयो के दिवारी पे पटाखा ने चलाहें, सो का चलाहें? सो चलाओ, खूब चलाओ मनो कम पावर को। जीसें कोनऊं खों कोऊ तकलीफ ने पौंचे। ईसे कान के पर्दे सोई सलामत रैहें। अपने डाक्टर हरें सोई हर साल जेई कैत आएं के पटाखे, फुलझड़ी, अनारदाना, राकेट-माकेट सम्हर के चलाओ चाइए। जांे छोटे लरका-बच्चा होंय सो उनको अकेलो ने छोड़ो, बल्कि उनके संगे रैत भए, उनको अपनी निगरानी में फुलझड़ी आदि चलवाओ चाइए। जब सब कछू ठीक रैहे, तभई ने दिवारी हैप्पी रैहे! सो, बोलो बिगैर प्रदूषण दिवारी मनेे हैप्पी दिवारी! 

     ------------------------- 

#डॉसुश्रीशरदसिंह #बुंदेलीलेख  #DrMissSharadSingh #पत्रिका  #patrika #rajsthanpatrika  #topicexpert #टॉपिकएक्सपर्ट 

#बुंदेली #सागर #बुंदेलीकॉलम  #HappyDiwali #शुभदीपावली #दीपावलीकीशुभकामनाएं