आज पत्रिका में "टॉपिक एक्सपर्ट" में बुंदेली में ...
Thank you #patrika 🙏
Thank you Dear Reshu Jain 🙏
..................................
टाॅपिक एक्सपर्ट
नंबरन की फंकाई नोईं असली विकास चाऊंने
- डॉ (सुश्री) शरद सिंह
काए, जे बसस्टैंडों की कोनऊं को फिकरई नई रैत? सरकारी वारे मुख्य बसस्टैंड में सफाई-मफाई की कमी बनई रैत आए, औ प्राईवेट बसस्टैंड की दसा? उते से ने तो बस वारे चैन से बसें निकार पाउत औ ने सड़क वारे उते से आराम से कढ़ पाउत आएं। वैसे सुनी तो रई के जा बसस्टैंड कऊं और जाबे वारो आए। जा सुने मनो कछू सालें सो होई गईं। सांची कैं, सो कोनऊं ने न सोची हुईए के जा सिटी चिंटियां की चाल से स्मार्ट हुईए। अब दिखाबे को का, जो कोनऊं वीईपी आबे वारो रैत, सो सड़क के डिवाइडर पे ताजी डगरियां खोंस दई जात आएं। उते वीआईपी गओ औ इते डगरियां सूकीं। कोनऊं-कोनऊं डगरियां ढीठ रैत हैं, सो उत्ते पे बी हरियाई रैत आएं।
मनो हमने एक दिनां मकरोनिया उपनगर के एक पार्षद से पूछ लई के "भैया, अपनी मकरोनिया को का हुईए? इते बसें तो सबई रुकत आएं, मनो इते एकऊं बसस्टैंड अब लो ने बन पाओ।" स़ो बे भैया बोले के,"उते स्मार्ट सिटी में सो कछू ढंग-ढार को हो नईं पा रओ, औ आप खों परी मकरोनिया की?"
हमने कई के काय ने परे हमें? अपन ओरें एकई बटरा के दाना आएं। सो ऐसो सौतेला ब्योहार नईं करो चाईए। उते तीन बसस्टैण्ड दए, औ मकरोनिया खों एकऊं ने दओ। ओ दसा जे, के एक तरफी देसी दारू के अहाते के आगूं बस ठाड़ी होत आए, तो दूसरी तरफी अंग्रेजी वारी के आगूं। कछू तो ढंग की प्लानिंग करो भैया हरों! चाए मकरोनिया होए, चाए सागर, जे अपनो शहर आए, कोनऊं एलियन को नोईं। इनके लाने नंबरन की फंकाई नोईं, असली विकास चाऊंने।
-------------------------
#डॉसुश्रीशरदसिंह #बुंदेलीलेख #DrMissSharadSingh #पत्रिका #patrika #rajsthanpatrika #topicexpert #टॉपिकएक्सपर्ट
#बुंदेली #सागर #बुंदेलीकॉलम
No comments:
Post a Comment