स्मार्ट सिटी में पगला कुत्ता? जे न चलहे!
- डॉ (सुश्री) शरद सिंह
जे हर की साल हो रई के स्मार्ट सिटी में कौनऊं ने कौनऊं कुत्ता पगलया जात आएं औ लोगन खों काटत फिरत आए। जब लौं बा दस-बीस खों काट नईं लेत तब तक प्रसासन ऊकी खबरई नईं लेत आए, मनो जे कछू गंभीर बात ने होए। काट रओ, सो काटन देओ। औ प्रसासन को खबर जबे आत आए, जब पब्लिक चिचियान लगत आए के “काट लओ, काट लओ!”, “कबे पकरहो?” तब कऊं जा के जिम्मेवार हरें जागत आएं औ सहूरी बंधात आएं के “तनक गम्म खाओ, अबई देखत आएं!” औ तब तक दो चार औ कट जात आएं। ई दफा तो गजबई की रई। पत्रकार हरन ने बा पगला कुत्ता औ आवारा कुत्तन के बारे में पूछो तो जवाब मिलो के कुत्तन की नसबंदी के लाने टेंडर डारो गओ आए। मने उते एक पगला कुत्ता बीस जने खों काटत फिरत रओ औ इते नसबंदी को टेंडर डारबे को काम चलत रओ। बाकी जे समझ ने आई के बा पगला कुत्ता की प्राब्लम से कुत्तन की नसबंदी को का मेल?
जेई तो सल्ल आए के राजकाज की मुतकी बातें पब्लिक को समझ ई में नईं आत। सो, पगला कुत्ता से कटत भई पब्लिक भैरानी सी फिरत आए। तंगा के विजय टॉकीज चौराहा पे कछू दुकानदारन ने बैनर सोई लगा दओ के “नो सर्विस, नो टैक्स”। उनको कैबो आए के जोन सेवाओं के लाने हम ओरें टैक्स भरत आएं बा तो नगर निगम देत नइयां, सो अब हमें भी टैक्स नहीं देने। मनो उनको कैबो बी सई आए के पगला कुत्ता से कटवाबे के लाने टैक्स थोड़े दओ जात आए। बाकी जे गिचड़ को जो कछू होय पर पगला कुत्ता इत्ते दिनां लौं काटत फिरत रओ, जे तो गलत आए। ई पे तो एक्शन लओ जाओ चाइए। सई कई के नईं?
------------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #PatrikaNews #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment