पत्रिका | टॉपिक एक्सपर्ट | बुंदेली में
सई समै पे व्यवस्था काए नईं सुदारी जात
- डॉ (सुश्री) शरद सिंह
“हम तुमें सुदार दैबी!” जे डायलॉग बरहमेस सुनबे खों मिलत आए। बाकी सबको नोंईं, उन ओरन खों जो कोऊं के खेत काट लेत आएं। खेत मने सई के खेत नोंईं, जे तो अपनी बुंदेली कहनात आए। मने कोऊ ने कोनऊं को काम बिगरो होय। अब आप कैहो के इते तो सबई तरफी काम बिगरे दिखात आएं, पर इते तो कोऊ कोनऊं खों सुदारत नईं दिखात। आपकी बात सई आए। मालक हरें फंकाईं सो मुतकी दे देत आएं, मनो उने फुरसत कां के बे जे देखें के उनके कै पे कछू काम हो बी रओ के नईं। कछू मालक हरें सो अपनी सियासी भिड़ंत में लगे परे। औ बाकी आएं सो बा वारी कहनात सांची करबे में जुटे रैत आएं के “बनी ने बिगारी तो बुंदेला काए के।
बाकी अबे इते सियासी बात नईं करी जा रई। जोन खों जोन से प्राब्लम होत सो होन देओ, अपन तो ठैरे पब्लिक, सो अपन ओरें तो नोंन, तेल, लकरिया में बिंधे रैत आएं। अपने इते सई समै पे काम ऊंसई नईं होत। अब आपई ओरें देखो के जबलों मानसून ने आओ, तब लौं नरदा की सफाई सुरू ने भईं। इते मानसून के पैले बदरा बरसे औ उते नरदा की सफाई चालू भई। अब हुइए का के आधो गिलावो बै के नरदा में चलो जैहे औ जबलौं बा गिलावो उठाओ ने जैहे, ऊंसई गंद मची रैने। मकरोनिया समेत मुतकी जांगा पे जोई हो रओ। कटरा में सो ट्रैफिक सुदारत, सुदारत सिधरई गओ। अब टाईम मैनेजमेंट की कां लौं कई जाए, काए से के लेडीज पब्लिक टायलेट में बरहमेस तारो डरो रैत आए। जेई से कभऊं-कभऊं पूछबे को जी करन लगत आए के मालक हरों! अपने इते सई समै पे व्यवस्था काए नईं सुदारी जात?
------------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment