पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
..................................
टाॅपिक एक्सपर्ट
सबरी बिटियन की बरहमेस जै हो !
- डॉ (सुश्री) शरद सिंह
जोन दिनां दसमीं औ बारमीं बोर्ड परिच्छा को रिजल्ट आओ, ऊ दिनां से सबरे बिटयन की जयकारे कर रये। औ करो बी चाइए। ई साल दसमीं औ बारमीं को रिजल्ट ने फेर के दिखा दओ के बिटियां पढ़बे में सबसे आगे रैत आएं। ऊमें भौत सी बिटियां तो अपनी मताई के संगे घर के काम में हाथ सोई बंटाऊत आएं। अच्छे नंबरन से पास होबे वारी सबरी बिटियां ऐसी नोईं के उने पढ़बे की भौत सुविदा मिलत हो। मेरिट में आबे वारी एक मोड़ी तो छोटे से गांव की आए। उते तो ज्यादा सुविदा बी नईं, फेर बी ऊने जम के मेहनत करी औ ऊने दिखा दओ के कोनऊं परेसानी ऊको मेरिट में आबे से ने रोक पाई।
आज के जमाने में जो कोनऊं बिटिया पैदा होबे पे अंसुआ ढारत आए, तो ऊ टेम पे जोई जी करत आए के ऊको जम के लपरया दओ जाए। औ ऊसे कओ जाए के अरे मूरख, बेटा औ बिटिया दोई बरोबर होत आएं। मोय तो आज लौं जे समझ ने आई के बिटियन खों बेटों से कम काय मान लओ जात आए? बिटियां कोनऊं से कम नईं होत। आजकाल तो सबई फील्ड में बिटियां अपनी काबीलियत के झंडे गाड़ रईं। चाए फौज होय, चाए पुलिस होय, चाए इंजीनियर, डॉक्टर हों, चाए राजनीति होय, चाए पत्रकारिता होय, बे कऊं पीछे नोईं। सो, अब तो जे भरम उतार फेंको चाइए के बिटियां कमजोर होत आएं। जो मताई-बाप बिटयन को साथ देत रैहें, सो बे ऐसई सबसे आंगू रैहें। सो, सबरी बिटयन की बरहमेस जै हो!
-----------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment