पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
..................................
टाॅपिक एक्सपर्ट
तारीफें सोई करो चाइए
- डॉ (सुश्री) शरद सिंह
बड़े-बूढ़े कै गए आएं, के जो कोनऊं गलत काम हो रओ होय औ ने तो कोनऊं कामचोरी कर रओ होय, सो ऊकी खिंचाई करी जाओ चाइए। जोन से बा सुधर सके। मनो, जो कोनऊं अच्छो काम करे सो ऊकी तारीफें सोई करी जाओ चाइए। अपने नगर निगम ने हमाई जान में पैली दार ऐसो अच्छो काम करो आए के ऊकी तारीफें तो बनत आएं। ऐसो नईयां के नगर निगम अच्छो काम नईं करत, बाकी ऊमें कोनऊं ने कोनऊं कमी-बेसी रै ई जात आए। अब सोचबे की बात आए के उते सिविल लाइन पे वीसी बंगला के इते अच्छो नोनो पब्लिक टॉयलेट बनो आए, जो अगर खुलो रै तो बिटियन खों, लुगाइयन खों खीबई सुविदा होय। मनो उते तो बरहमेस तारो डरो रैत आए। कुची कां रैत, जा कोनऊं खों पतो नईं। अब जे, सब कछू हो के बी कछू ने होबे वारी बात भई, के नईं? ऐसी मुतकी कमियां गिनाईं जा सकत आएं।
मनो अबे तो बात हो रई तारीफ करबे की। नवरातें की अखीर में देवी मैया के जित्ते बी चलसमारोह निकरे, उनके पाछूं-पांछू चल रए नगरनिगम के ‘सफाई मित्र’ सफाई करत गए। ईसे जुलूस निकरबे के घंटा-खांड़ के भीतरे सड़कें साफ दिखन लगीं। सो, जे भई ने नगरनिगम खों तारीफें मिलबे वारी बात! औ जो अच्छो काम होय सो ऊकी तारीफें करबो बी जरूरी आए। रामधई, जो ऐसई तारीफ जोग काम जे करत रैं, सो कित्तो अच्छो होय। अपनो सागर सोई इंदौर घांईं सच्ची को नंबर वन बन जाए औ सच्ची तारीफें मिलें।
-----------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment