पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
..................................
टाॅपिक एक्सपर्ट
चलो जाती साल को रिपोर्ट कार्ड देखो जाए, अब अगली साल मिलबी
- डॉ (सुश्री) शरद सिंह
लेओ दिसम्बर सोई बढ़ाओ जा रओ। बड़ो टेढ़ो-मेढ़ो, ऊंचो-नीचों रओ जा साल। कछू बड़ी-बड़ी बातें सोई भईं। मने बड़े-बड़े नेता इते आए। उन्ने बड़ी-बड़ी घोषणाएं करीं। बड़े नेता हरों के आत-जात रैने से जे भओ के जिते-जिते उनकी अवाई भई उते की सूरत बदल गई। कऊं कसरत के कटआउट लग गए, तो कऊं झरना बना दए गए। डिवाइडर के पेड़न की ने सोचियो, काए से बे तो दिखात के दांत आएं। मनो ई साल की जाती बेरा में एक बड़ो अच्छो काम भओ के लाखा बंजारा की स्टेच्यू को अनावरण कर दओ गओ। मुतको समै हो गओ तो उने मों ढांके ठाड़े।
चलो, तनक जे सोई गिन लओ जाए के ई साल कोन-कोन से काम पूरे भए औ कोन से नईं भए। अब बो सरकारी बसस्टैंड खों ले लेओ। बसई वारन ने उते जाबे से मना कर दओ। मने करोड़न को फ्लॉप शो। चलो कोई नईं, सरकारी कामकाज में जे सब चलत है, अपन ओरें सोई भुला देत आएं। ऊंसई देखो जाए तो अपन ओरें “यूज़ टू” ठैरे। जो जे ने समझ परे सो मान लेओ के अपन ओरें चिकनों घड़ो ठैरे। काए से के ई साल बी रोडें खुदत रईं औ जे साल बी टाटा को 24 घंटों वारो पीबे को पानी ने मिलो। आवारा पशु आज बी छुट्टा फिर रए रोड पे। ऊपे जिला अस्पताल औ बीएमसी के मर्जर की सल्ल बींध गई औ हाथठेला वारन की तो मनो कोऊ ने सुनई नईं। सो जे रई कछु गिनती, बाकी आप ओरें खुदई गिन लइयो। अब मिलबी अगली साल। तब तब के लाने जै राम जी की!
-------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment