ने घबड़ाइयो औ ने अफवा फैलाइयो
- डॉ (सुश्री) शरद सिंह
ऑपरेशन सिंदूर जारी आए।पाकिस्तान खों जो बतानों जरूरी हो गओ रओ के आतंकियन के कंधा पे बैठ के बा काऊं नईं पौंच सकत, खाली धूरा में मिल सकत आए। बाकी अपनी सेना उते की पब्लिक को नईं मार रई, बा तो आतंकियन खों ढूंढ-ढूंढ के ठोंक रई। जे कहाऊत आए इंसानियत। जेई से तो सगरी दुनिया अपने संगे आत जा रई। ऊंसई गलत करबे वारे खों कोऊ नईं पूछत। पाकिस्तान खों ईंसे सबक लऔ चाइए। बाकी अपन खों सोई एक बात को ध्यान राखने के ने तो घबड़ाने आए औ ने अफवाएं फैलाने। का होत आए के हम जा सोच के घबड़ान लगत आएं के अब सो लड़ाई छिड़ गई, अब का हुइए? सो, भरोसो राखो के कछू बुरौ ने हुइए। अपनी सेनावारे उने उतई उनई के घर में घुस के मार रए। बे इते लौं ढूंक बी नईं सकत।
औ हां! सबसे बड़ी बात के सोसल मीडिया की खबरन पे ज्यादा भरोसो ने करियो औ ने अफवाएं वारी पोस्टें फार्वर्ड करियो। ई टेम पे सरकारी एजेंसी की खबरें औ अखबार की खबरें सबसे भरोसे की आएं। होत का आए के जे लड़ाई औ हमले की पोस्टें डारबे वारे नाएं-माएं से कछू बी बटोर के पोस्ट करन लगत आएं, अब बे खुद तो फ्रंट पे बैठे नईयां के अपनी सगी आंखन से देख रए होंए। सो, उनपे भरोसो ने करियो औ ने भड़काए वारी पोस्टें डारियो। जे टेम मिलजुल के रैबे को आए। बे तो चाउतई आएं के हम आपस में लड़त रएं, सो, अपन खों उनको सोचो भओ नई करने। सहूरी राखो, अपनी सेना पे भरोसो राखो औ शांति से रओ। अपन जीतबी औ उने छठीं को दूद याद कराबी। जै हिंद! जै भारत!
------------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment