पत्रिका | टॉपिक एक्सपर्ट | बुंदेली में
टॉपिक एक्सपर्ट
नल महराज बतकाव नईं करन देत
- डॉ (सुश्री) शरद सिंह
कछु टेम से बड़ो गड़बड़-झालो चल रओ। बात का आए के हमाए एक चिन्हारी वारे क्रिश्चियन कॉलोनी के इते रैत आएं। उनसे हमाई भौत घुटत आए। बे आएं तो हमसे बड्डे, मनो हम ओरें मोबाईल पे जब जुटत आएं तो रेता चालबे को चलना घांईं अपनी बतकाव से सगरी दुनिया को साहित्य चाल लेत आएं। कभऊं-कभऊं तो घंटा खांड़ लौं बतकाव चलत रैत आए। संगे भौजी के एक्सपर्ट कमेंट के कछु तड़का सोई लगत रैत आएं। मनो मसला जे नइयां। असल मसला जे आए के आजकाल उनके इते जब फोन करो सो बतकाव चालू हो नईं पात, के उनके इते नल महराज टपक परत आएं। औ फेर उनके इते पानी भरबे की भगदड़ मच जात आए। एक दिनां हमने संकारे फोन करो सो नल आ गए, एक दिनां दुफारी को फोन करो सो नल आ गए। फेर हमने दो-चार दिनां बाद संझा को फोन करो सो नल महराज आन टपके। हमने पूछी के का आपके इते तीन टेम नल आत आएं? काए से हम जब फोन करत आएं आप पानी भरबे खों भगत फिरत हो। ईपे बे दुखी होत भए बोले, जेई तो सल्ल आए के नल आबे को कोनऊं फिक्स टेम नइयां। कभऊं बी आ जात आएं, सुभै, सांझ, दुफारी औ कओ सोऊत टेम रात खों आ जाए।
सो, उते तो जे हाल ठैरो। हो सकत के औ मोहाल में बी जेई सल्ल होए। अबे हमने दूसरे मोहाल में बात नईं करी। कओ पूरी सिटी में जेई सल्ल बिंधी होए। सो, मालक हरों सब जांगा नल को टेम तो फिक्स कर देओ ताके लोगन को आपस में बतकाव को सई टेम निकर सके। हम ओरन को तो ठीक, मनो कोनऊं को समधियाने टाईप को संबंध होए तो कओ रार मचन लगे के हमाई बात नईं सुनी जात। काय सई कई के नईं?
------------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #topicexpert #बुंदेली #बुंदेलीकॉलम
No comments:
Post a Comment