खुले डरे नरदा की खबर को लेहै
- डॉ (सुश्री) शरद सिंह
(पत्रिका | टॉपिक एक्सपर्ट | बुंदेली में)
सुन रये के ई दफा मानसून जल्दी आबे वारो। घाम में तपत टेम ऐसी खबर भौतई नोनी लगत आए। काए से के मानसून आहे तो पानी बरसहे, मोसम तनक ठंडो हो जैहे औ तब चाय औ भजिया खाबे को मजा आहे। चलो, एक सीन तनक सोच के देखियो के बायरे झिमिर-झिमिर पानी बरस रओ होए औ आप बरांडे में बैठ के गरम भजिया उठा के अपने मों में डारबे जा रए हो, औ तभई नरदा की बास आन लगे सो, कैसो लगहे? बस, जेई सीन होबे वारो आए ई बारिस में। काए से के अपने शहर में मुतके नरदा खुले डरे। बा में गंदगी बजबजा रई। चलो मान लओ जाए के मानसून के पैले नरदा हरों की सफाई करा दई जैहै, मनो जे बी सांची आए के सबरे नरदा साफ ने हुइएं। औ एक दफा नरदा साफ कराए से का ऊमें फेर के गंदगी ने हुइए?
तनक सिविल लाइंस के लिंगे इंदिरा कालोनी में जा के देखियो। बड़े-बड़े साजे मकान, अच्छे साजे रहवासी, पर भोग रए नरक सो। उते अच्छो बड़ो नरदा खुलो डरो। उते से निकरबे में जी मचलान लगत आए। ऐसईं-ऐसईं मुतके नरदा आएं जोन पे आज लौं एकऊ फर्शी ने धरी गईं। चाए सदर में देख लेओ, चाए काकागंज में ढूंक आओ सबई जांगा एक सी दसा आए। जे ऐसे खुले नरदा में आए दिनां ढोर गिरत-मरत रैत आएं औ बीमारियन की जड़ तो जे आएं ही। सहर के बिकास के लाने इत्तो बड़ो-बड़ो बजट आऊत आए, ऊमें से तनक नरदा खों ढांकबे में लगा दओ जाए सो कित्तो अच्छो हुइए। अब खुले नरदा की खबर स्मार्ट सिटी वारे औ नगरनिगम वारे ने लैहैं, तो को लेहै?
------------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment