टाॅपिक एक्सपर्ट
बे आवारा फिर रए औ खतरा बन रए
- डॉ (सुश्री) शरद सिंह
जो आवारा की बात चले, सो दो टाईप के आवारा को खयाल मन में आऊत आए- एक तो दो पांव वारे औ दूसरे चार पांव वारे। दो पांव वारन के लाने तो पुलिसई भौत आए, मनो चार पांव वारों में बी पैले आवारा फिरबे वारी गैया-भैंसिया याद आउत आएं। जबके इन दोई से ज्यादा मिलत आएं कुत्ता हरें। बाकी होत का आए के ऐसे आवारा कुत्ता हरों खों देख के दया-सी आन लगत आए। ठीक बी आए के जो अपन ओरें उनें रोटी-मोटी ने ख्वाहें, तो बे तो भूके मर जैहैं। सो आवारा कुत्ता हरों के लाने दया राखने जरूरी आए। पर ईके संगे खुद के लाने सोई दया राखने जरूरी आए। काय से के अपने इते आवारा कुत्ता की संख्या बढ़त जा रई। ईमें डरबे वारी बात जे आए के कभऊं जे आवारा कुत्ता पगला जात आएं। औ इनके काटे से रैबीज नांव को जानलेवा इंफेक्शन हो जात आए। जो सही टेम पे दवा मिल जाए तभईं जान बचत आए, ने तो कटो भओ मानुस सोई पगला जात आए। औ दुख की बात जे आए के पगलाबे वारे के प्रान बच नईं पाऊत आएं।
जे आवारा कुत्तन के बारे में डरबे वारी बात जे सोई आए के जे ओरें अब जुट्ट बना के फिरत आएं। ईसे होत का आए के जे बछड़ा-मछड़ा खों घेर के काट-कूट लेते आएं। छोटे बच्चा हरन खों सोई काट लेत आएं। सो, आज ई बात की भौतई जरूरत आए के जे आवारा कुत्तन खों को शहर से हटाबे के लाने नगरनिगम औ नगरपालिका कछू ठोस प्रयास करे, ताकि सबई सुरक्षित रए सकें।
-------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment