पत्रिका | टॉपिक एक्सपर्ट | डॉ (सुश्री) शरद सिंह | बुंदेली में
..................................
टाॅपिक एक्सपर्ट
जो औरतें तरक्की करहें, तो समाज तरक्की करहे
- डॉ (सुश्री) शरद सिंह
अपने इते समाज में का आए के औरतन की इज्जत तो करी जात आज, मनो उनको बुद्धि से कम समझो जात आए। जे करीब-करीब सबई के घरे होत आए के घर को आदमी चाए मताई होय, चाए लुगाई होय औ चाए बैन, भौजाई होय तनक-तनक सी बात पे जेई कैत मिलहे के “तुम जान देओ, तुमें समझ में ने आहे!”
भैया, काए समझ में ने आहे? अरे कछू डिस्कस तो करो, फेर बी समझ ने परे सो कओ! बात का आज के लौं औरतन खों कम कृ के आंको जात आए। जबके आजकाल औरतें सबरे छेत्रन में आंगू दिखा रईं। अपनी राष्ट्रपति एक औरत आएं। चलो दूर की छोड़ो, सो देखो के अपने सागर की सेंट्रल यूनिवर्सिटी की कुलपति एक औरत आएं। बे का ऊंसई यूनिवर्सिटी सम्हाल रईं? अरे, बे खुदई वैज्ञानिक आएं औ उने यूनिवर्सिटी अच्छे से सम्हालने के लाने मुतके अवार्ड मिल चुके। अपने गते कित्ती लौं औरतें पुलिस विभाग में आएं। महिला थाना की छोड़ बी दई जाए तो मुतकी पुलिसवालियां इते मुतकी जांगा काम कर रईं। महिला वकीलों की इते कोनऊं कमी नईं। एक से एस महिला डॉक्टर आएं इते। औ ई समै तो अपने इते महापौर औ सांसद सोई औरतें आएं।
इते अपने सागर में भौत सी महिलाएं शेयर मार्केट में सोई काम कर रईं। जबके पैले जे फील्ड आदमियन को मानो जात्तो। अपने इते महिला पत्रकार सोई खूब काम कर रईं। औ हमाए घांईं लिखबे-पढ़बे वारी महिलाओं की इते कोनऊं कमी नोंई। मुतकी औरतें स्कूल, कॉलेज में पढ़ा रईं। मुतकी दफ्तरन में काम कर रईं। मुतकी दुकानें सम्हाल रईं। मने हमाओ कैबे को मतलब जो आए के औरत खों कम ने मानियो। जे जान लेओ के जो औरतें तरक्की करहें, तो समाज तरक्की करहे। सो, अंतर्राष्ट्रीय महिला दिवस की सभी खों भौत-भौत बधाई!
-------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
#happyinternationalwomensday #WomensDay2025 #अंतरराष्ट्रीयमहिलादिवसकीहार्दिकशुभकामनाएं
No comments:
Post a Comment