टॉपिक एक्सपर्ट | पत्रिका | शहर को भलो करने तो गणतंत्र को मान राखो | डॉ (सुश्री) शरद सिंह

पत्रिका | टॉपिक एक्सपर्ट | डॉ (सुश्री) शरद सिंह | बुंदेली में

..................................

टाॅपिक एक्सपर्ट

शहर को भलो करने तो गणतंत्र को मान राखो

- डॉ (सुश्री) शरद सिंह

      अपनो शहर को भलो को नईं चात? सबई चात आएं। सब सोचत आएं के अपनो शहर खूबई साजो रए, साफ-सुथरो औ तरीका को रए। संगे सोचत आएं के जिला परसासन औ नगर निगम सब कछू सई-सई करे। पर जब सबरे काम ढीले दिखात आएं तो हमें बुरौ लगत है। हम उने कोसत तो आएं मनो जे याद नईं रखत के जे गणतंत्र आए औ अपने संविधान ने अपन ओरन खों कछू नागरिक अधिकार सोई दए हैं। जोन देस में नागरिकन खों अधिकार दए जात आएं उतई गणतंत्र होत आए। जे बच्चा जानत के गण मने पब्लिक औ तंत्र मने सासन। सो गणतंत्र कहाओ अपन जनता को सासन। अब ईमें कोऊ का कर सकत के अपन सासन करबो नईं जानत। जबके दूध पीयत वारो बच्चा बी अपनो अधिकार खों जानत आए। ऊको टेम पे दूध नईं मिलत तो बा चिंचियां-चिंचियां के घर के सबई लोगन खों बता देत आए के ऊको दूध चाऊने। मनो, अपन मों बोल के नईं जानत। जब कछु मांगबे की बेरा आऊत आए तो जेई सोचत आएं के हमाए बदले कोऊ औ मांग ले। तनक सोचियो के जेई बात दूध पीयत बच्चा सोचन लगे तो बा तो भूको मर जाए।

     कैबे को मतलब जे आए भैया हरों, के अपन ओरें गणतंत्र खों मान राखें। सासन-परसासन खों समै-समै पे बताऊत रएं के अपन ओरन को अपने शहर में का, कैसो चाउने। संगे जे सोई बताएं के परसासन कां का गलत कर रओ। जो जे ऐसो कर के हम अपने शहर को अच्छो बना सकत हैं। संविधान ने अपन खों बोलबे, लिखबे, पढ़बे को अधिकार दए हैं। इन अधिकारों को परयोग कर के अपने शहर को भला कर सकत हैं। सो, गणतंत्र को मान राख के अपने शहर खों संवारबे की सोचो। औ बोलो जै गणतंत्र !!!

-------------------------

Thank you Patrika 🙏

Thank you Dear Reshu Jain 🙏

#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका  #patrika #rajsthanpatrika #सागर  #topicexpert #बुंदेली #बुंदेलीकॉलम