जब हमारी प्रिय सांसद लता वानखेड़े 'ड्रीम गर्ल' सांसद हेमा मालिनी जी से मिलीं....
रामधई, हमाओ जी जुड़ा गओ!
- डॉ (सुश्री) शरद सिंह
(पत्रिका | टॉपिक एक्सपर्ट | बुंदेली में)
अब आप ओरें सोच रये हुइयों के इनको काए से जी जुड़ा गओ? इनें ऐसो का दिखा गओ? काए से के जा बारिस ने तो सगरी पोलें खोल के धर दई आएं। कऊं सड़कन पे गड्ढा दिखा रये तो कऊं दरारें कढ़ आईं। कहूं नरदा को पानी घरे घुस रओ तो कहूं अच्छी नोनी कॉलोनी तला में बदल गई। अबई कल्ल की बात आए के बीना के हमाए पैचान वारे भैया जी ने अपने घरे की फोटू सोसल मीडिया पे डारी जोन में उनके घरे पानी भरो दिखा रओ। बे कवि आएं, सो इत्तई में इमोशनल हो गए। ऊपे कछु सयानों ने उने डरा दओ के ‘हर घर जल’ योजना को उनें टैक्स देने परहे। मने दूसरों की उधड़ी में उंगरियां टुच्चबे में कछु लोगन खों भौतई मजो आऊत आए। सो, अब जे सब तो हो नईं सकत हमाए जी जुड़ाबे को कारन। हऔ, सई समझे आप ओरें। अब गांव-देहात के सरकारी स्कूलन में छत से पानी टपक रओ, मोड़ा-मोड़ी फट्टी पे बैठ के पढ़ रये। अब जा देख के थोड़ई हमाओ जी जुड़ाहे?
बाकी, अब सस्पेंस खोल दओ जाये के का देख के हमाओ जी जुड़ाओ। हमने संसद की छिड़ियां पे अपनी सांसद लता वानखेड़े जू की फोटू देखी, वा बी ड्रीमगर्ल रईं सांसद हेमामालिनी जू के संगे। औ रामधई ! हमें अपनी सांसद उनसे काऊं कम नईं दिखानी। सो, बा फोटू देख के हमाओ तो जी जुड़ा गओ। अब अपने सागर के लाने अच्छे-अच्छे काम औ करात चलें सो हमाओ मूंड़ शान से ऊंचो बनो रैहे औ एसईं जी जुड़ात रैह। काए से के इंसान को काम ई सो ऊको असली पैचान देत आए।
------------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment