पत्रिका | टॉपिक एक्सपर्ट | बुंदेली मे
ने तो आईलैंड-आईलैंड खेलत रइयो
- डॉ (सुश्री) शरद सिंह
कल संझा को का भओ के हम लौट रए हते मकरोनिया के मंगल भवन के इते से। जैसई हम मकरोनिया तिगड्डा के लिंगे पौंचे सो हमने उते नए बने आईलैंड के सकरौंदे की ई तरफी से अपनी स्कूटी निकारी औ तभईं आईलैंड की ऊ तरफी से एक जनीं अपनी स्कूटी पे निकर आई़ं। हम दोई आपस में भिड़त-भिड़त बचे। हम ओरन ने एक-दूजे खों खोंखिया के देखो। औ फेर देखतई रै गए। काए से हम दोई पुरानी चिन्हारी वारे निकरे। मनो कुंभ में बिछड़े हते औ कल संझा आईलैंड की किरपा से मिले। हमें बड़ो अच्छो लगो। हम ओरें उतई तिगड्डा पे एक जांगा कॉफी पीबे पौंच गए। हम ओरें अपने पुराने दिनन की याद करन लगे।
सो, कल संझा से हमें सबरे आईलैंड अच्छे लगन लगे, ने तो पैले हमई गरियात फिरत्ते। काए से के जब से बे आईलैंड बने तभईं से तिगड्डे पे औरईं गदर सी मचन लगी। ऑटो वारे होंए चाए बाईक वारे, कोऊ ई तरफी से निकरत, तो कोऊ ऊ तरफी से, मनो छुबाछुबउअल खेल रए होंए। ईके पैले उते सिविलेन चौराए पे आईलैंड बनाए गए, वा बी उते की रोटरी मिटा के। अब उते हरी बत्ती होतई सात, बीच चौराए से सबरे ऐसे दौड़त आएं जैसे छुट्टी की घंटी बजत सात स्कूल के मोड़ा-मोड़ी दौड़ रए होएं। उते आईलैंड को रोल का आए कोनऊं खों नईं पतो। सो, ने तो आईलैंड को रोल समझा दओ जाए, ने तो एक ठइयां बोर्ड लगा दओ जाए के इते कुंभ के बिछड़े मिलत आएं। बाकी ट्रैफिक को गदर तो लाईलाज दिखात आए। अब आप ओरन खों कछु सूझे, सो सलाए दइयो। ने तो आईलैंड- आईलैंड खेलत रइयो!
------------------------------
Thank you Patrika 🙏
Thank you Dear Reshu Jain 🙏
#टॉपिकएक्सपर्ट #डॉसुश्रीशरदसिंह #DrMissSharadSingh #पत्रिका #patrika #rajsthanpatrika #सागर #topicexpert #बुंदेली #बुंदेलीकॉलम
No comments:
Post a Comment